Mikael Bodlore-Penlaez

Diouzh e vicher eo dedennet gant ar gartennoùriezh hag e plij dezhañ sevel kartennoù hag atlasoù a denn da Vreizh ha d'ar pobloù minoraelaet. Pourveziñ a ra kartennoù evit levrioù embannet e Breizh. Asambles gant Divi Kervella en doe savet, skeudennet ha sinaet meur a levr war an tachennoù e vourrent plediñ ganto : kartennouriezh, bannielouriezh hag ardamezouriezh[1]. Krouet en doe e 2005, gant skoazell Divi Kervella, Geobreizh, porched douaroniel Breizh, evit pourveziñ kartennoù brezhonek, kartennoù Breizh istorel, rolloù anvioù douaroniel…[2]

E 1999 en deus krouet al lec’hienn Eurominority.eu ha war-lerc’h en deus renet Atlas ar broadoù hep Stad e Europa, ul levr diwar-benn stad pobloù minorelaet e Europa, ha troet e saozneg hag e galizeg. Stourmañ a ra evit gwir ar pobloù d'en em dermeniñ ha kemeret en doa perzh en intrudu YesBreizh.net a gas war-raok dizalc’hiezh Breizh.

Ur soner gaolviolin anezhañ ez eo dedennet gant ar sonerezh klasel e Breizh hag en deus kensavet ul levr gant Aldo Ripoche. Ul levr flemmus a-enep an adreizh tiriadel en deus skeudennet ha skrivet gant Erwan Chartier-Le Floch.

E 2015 en doe krouet ar gevredigezh Bannieloù Breizh m'emañ prezidant anezhi.

Kemeret en deus Mikael Bodlore-Penlaez perzh er stourmadeg evit ma vo degemeret an astenn Internet .bzh evit Breizh. E 2006 en deus skignet ur goulennadeg war lec’hienn Geobreizh.com evit-se. A-drugarez d’an obererezh-se o deus en em ziazezet meur a strollegezh lec'hel (Rannvro Breizh peurgetket) gant un doare ofisiel. Deuet eo da vezañ besprezidant ar gevredigezh www.bzh he deus bet d’an 13 a viz Mae 2013 an aotre gant an ICANN (Internet Corporation for Assigned Names and Numbers) da implijout an astenn nevez.

Mammenn : Wikipedia